صبحيّة مع الربّ

شو حلو حنانك يا ربّ، إنت اللي تحنّنت عالبشريّة وبعتت وخلقت يوحنّا، من زكريّا الشيخ وأليصابات العاقر اللي آمنو بمجيء المخلص، يوحنا اللي خصّصتو إنّو يمهّد الطريق قدامك تا تنزل من قلب الآب وتتجسّد عا أرضنا تا تخلّصنا من الضياع والهلاك

شو عظيمة رحمتك يا ربّ، اللي تجلّت بإرسالك الأنبياء وآخرن يوحنّا المعمدان تا يدعو الناس للتوبة الحقيقيّة والإستعداد للقاءك، إنت المخلّص الحقيقي للإنسان

شو صادق حبّك وإلهي يا ربّ، إنت اللي حبّيتنا حتى الموت، وعلّمتنا كيف نحبّ بصدق، نغفر بصدق ونسامح بصدق، إنت اللي ما بتتعب من ضعفنا وبتدعينا للتوبة وللإنطلاقة الجديدة معك

علّمنا يا ربّ كيف نكون متلك، نعرف نحبّ ونسامح ونغفر ونخدم ونعيش حنانك مع الآخرين

/الخوري يوسف بركات/